التأمينات

مساكم الله بالخير


مؤسسه حمير الكد الاجتماعيه !
مؤسسه طالع واكل نازل واكل الاجتماعيه!
اي تامينات اي خرااااااااااااابيييييييييت ! بيط !

مع زيادة جرعة الفراغه عندي و الملل و ارتفاع معدل درجة الحرارة و الحوار كان يدور عن التقاعد
قام الخيال شطح فيني شوي
و قعدت اتخيل تقاعدي و الهنا اللي راح اعيش فيه و النوم لي الظهر و البراد و السفر و راحة البال و
غيرها من الاحلام الوردية (طبعا طل بعيني احلام احلام)

قمت تفلسفت
و انطقيت على رااااسي
و ادق على الخدمه الهاتفيه للتأمينات الاجتماعيه

انا : السلام عليكم
الموظفة : و عليكم السلام اختي تفضلي
انا : بس بغيت اعرف متى وقت تقاعدي بالضبط لو تشوفين لي اياه الله يعافيج؟
الموظفه : اختي تقاعدج لما يكمل عمرج 55 سنه ان شاء الله يعني باقي 27 سنه ان شاء الله
انا : شدراج باقيلي 27 سنه على ال 55 !!
الموظفه : اختي اول ما دقيتي انتي دخلتي رقمج المدني و طلعت عندي البيانات
انا : اي اي وي سوري بس من الصدمه اللي قلتيها مو مني !! شنو بعد 27 سنه من صجج؟
الموظفه : اختي هذا القانون اليديد 50 سنه عمر المتزوجه للتقاعد و 55 سنه لغير المتزوجه
انا : بس انا سمعت ان القانون اليديد ما يطبق علينا ؟ بس على مواليد اخر الثمانينات و اليدد يعني !
الموظفه : لا اختي مواليد الثمانينات و السبعينات بعد مشمولين بالقانون .. مواليد 71 و 72 اللي ممكن يكون
مطبق عليهم القانون القديم حسب الحاله
انا : لحظه بس انا على ما يصير عمري 55 سنه اكون خدمت فوق 32 سنه !!
الموظفه : بالضبط اختي و يطلع لج 90% من الراتب الاخير و على كل سنه فوق ال 30 مكافأه
انا و باستماته يمكن اني مو فاهمه : ياربي يعني بعد بشتغل 27 سنه من صجكم انتوا ! عمري 55 بعد شبي بالتقاعدي !
انزين و اذا تزوجت (خير ان شاء الله) هم لي عمري 55؟
الموظفه : لا المتزوجه 50 سنه بس تكون عندها أولاد و الزواج طاف عليه اكثر من سنتين متصلتين و اذا ماعندها عيال تثبت
انها على ذمه زوجها و تييب شهاده من مختار المنطقة انهم عايشين في سكن الزوجيه
انا : كدينا خير ! يعطيج العافيه ! مع السلامة !


من صجججججججججججججججججججججججججهم هذول؟؟؟؟
بعد 27 سنه اتقاعد!!!!!!! ليشششششششش ّ!!
مكدة حميييييييييييير !!!
قبل 15 سنه خدمه و خلصنا !! 55 سنه لغير المتزوجه و 50 سنه للمتزوجه و 60 سنه للرجل ليشش؟
شماااااااااله؟؟
شبقا من العمر !!!
عرفت صراحه معنى الايه "لا تسالوا عن أشياء ان تبد لكم تسؤكم" !!!

يااااااااا هايف الهايف
يا طبطبطبطبطب
ياااا بوصراااخ
ياللي تبون تكرمون المرأه و تعفونها و مادري شنو !
وينكم عن هالقوانين اللي مادري شسميها !
يا تحالف يا حقوق انسااان !
شنو هذاااااا ! وينكم عن قوانين التأمينات الاجتماعيه !!

انا اعترض !! احنا مو دولة رأسماليه؟ و يبونا نصير اسلامية 100%؟
ليش قانون تأميناتنا اشتراكي بحت !!
و غصب بعد التسجيل !

يعني اللي معاشه 1000 دينار يدفع شهري 70 دينار 7% و الدوله الباجي
و لمدة خنقول من 23 سنه الى 55 سنه
يعني 32 سنه
جم سنه بالله باخذ معاش تقاعدي !!
بالله مت عمري 55 و الا 54 !!

اغراااء

صبحكم الله بالخير

حرام البنت تطلع متعطره و تعتبر زانيه عشان ما تغري الولد المسكين

المرأه تتحجب و تتغطا عشان ما تغري الرجل و تفتنه

المرأه لازم تخفض صوتها عشان ما تفتن الرجل بصوتها العذب و تلفت نظره

تحتشم و تلبس اسود و سادة عشان ما تلفت انظار الذئاب الرجال

تمشي مشيه عسكريه و سريعه للأمااام سر عشان لا تكون في مشيتها ميوعه و تكون مصدر فتنه للذكر

يفضل تقعد في بيتها و ما تروح الأسواق و لا تقعد بكوفيات و لا اماكن عامه عشان ما تزاحم الرجل و ايضا ما تكون له فتنه

ماكو سباحه بالبحر

ماكو بقيات عيييييب ماكو قواااري عيييييييب تفتنين الريال !!

عفيه ريال ما عنده شغله غير التفتن !! او الانفتان بشكل أصح

و القائمه طويله وااااايد وايد

طبعا غير المتشددين اللي ما يبونها تسوق سياره عشان ما تزاحم الرياييل و تكون لهم عائق

سؤال و استفسااري علما بأني لا اعترض على أي حكم شرعي أو فرض من رب العالمين أبداا .. حشا لله .. بعد ينقز لي باجر الطبطبائي بيقيم علي الحد كلش مالي خلق ما تمتعت بدنيتي ليلحين !

بس مجرد تساؤل نفسي من نفس عاصيه ناااقصه .. كل هذه الاجراءات و الحكرااات للمرأه عشان السيد الرجل لا ينفتن و لا ينغري و ياخذ راحته بدنيته بدون اشيااء تحرك مشاعره الدااخليه

اما ما يدووور في خلدي .. المرأه الفقيره المسكينه ما لها مشاعر ؟ مالها رغبات ؟

لي هف الريال متزقرت و متنسنع و البخور يفوووح و دهن العود يفر الراس

ما تنغري؟

لي كشخ الريال و عدل القفل و ذيج الغتره المنشيه و النظره السهميه

ما تتحرك مشاعرها؟

لي راحت بعباتها و حجابها و قعدت بالشاليه و الا على يال البحر تطالع الناس و الريال بذاك الشورت و الا المايوه الزين و الجسم و الى اخره ما راح تحس و تفتن؟

كل هالتخربط عشان بعرف اخواااتي البنات و السيدااات و الانسااات و العانسااات و المطلقات و الارملااات

تنفتنون و الا مشاعر نهي ؟

عفوا أبلة نورية..

عفوا أبلة نورية ..
أيدناج ..
وقفنا معاج ..
رفعنا أكفنا تحية لكي و لموقفج السابق ..

و لكن سؤال أقلق مضجعي .. صراحه قوية الكلمة !!
ما علينا ..
ما هو سبب الرفض القاطع لتأجيل بداية الدراسة الى بعد شهر رمضان ؟

حرصا على المناهج الدايخه اللي لو تأخروا فيها الطلبة و طافهم منها شي بيكون لمصلحتهم مو ضدها؟
تعنت و إصرار عنادي على الرأي؟
مخالفة المتأسليمين و المصارخين في مجلس الخمه؟ رمضان لنا كلنا مو لهم اهمه بس !

شفيها إذا تم التأخير هالجم يوم و تم تعويضهم تالي؟
فيكم خير و حرص و و و و ؟

طلبتنا عند كل إجازه رسميه قاعدين ياخذون يومين قبلها و يوم و الا يومين عقبها !
طلبتنا "معظهمهم" اذا عندهم امتحان بنفس اليوم ما يداومون ! يمتحنون و يطلعون كلهم مرضا اسم الله عليهم هاليوم !
من عمر الدنيا معروفين طلبتنا اول اسبوع دوام ماكو دراسة جديه و لا محسوب على قولتهم فماكو دوام !
قبل العيد طبعا عيب يداومون لازم 3 4 ايام يشبكونها مع العيد ! شاليه مخيم سفره نومه بالبيت !
محرم مو عطله رسيمه لكن طبعا غياب عادي مو محسوب
يوم بين عطلتين راااح فيها
و القائمه لا تنتهي بتضييع أيام الدوام و غيرها

و لا قدرتوا عليهم !

فليش يينا على رمضان و العشر الأواخر و قلنا لا ! المناهج بتتأخر ! و العام الدراسي بيتخلبط !
و الكالندر الدراسية بتعتفس ! من زينها عاد؟

أبلة نورية عذرا بس لا أرى سالفة لقرارج و إصرارج عليه !

مساء الخير بتوقيت قرينتش

تفائلنا بحل مجلس أغلب ساكنيه خمه

و اجتهدنا لنشر الوعي و تنبيه الأمه


فانصعقنا بنتيجة أسوأ من تلك المره

و فازت طائفيه و قبلية و مصالح زادت القلب حره
و لكن بوادر خير ظهرت في هذه الكره

فاشتعلت بالقلب آمال تعيد أمجاد هذه الدرة

و أنطلقنا نلملم شتات أنفسنا بألم و حسره

مستعينين بحكمة المولى فعسا أن نكره شيئا يجعل الله فيه الخير بكثره

فدعونا الله مخلصين بأن تأتي حكومة تزيح غمام نتائجنا المره

فلم تلد بعد عسر مخاض الا من زادوا حسرتنا حسره

فلم يبق لنا الا بقايا آمال بافتتاح يبث فينا النشوة

و حسن نوايا و إصلاح بين"ن" وعدونا بها أكثر من مره

و ذهبنا آملين بجلسة نفخر برقيها ولو مره

فأبى الرعاع الا ان يزرعوا في قلوبنا غصه

و أسمعونا نهيقا أباد أحلام بأوضاع مستقره

و تلاشت وعود إصلاح و تنمية مستمره

و أقسموا أيمانا بأن لا يجعلو للأمل بقايا و لو ذره

ألم أقل بأن الحل لم يزد خمتنا الا خمه ؟

و ذهبت أناجي وسادتي لانعم بحلم خير من واقعهم بألف مره